Fjölmenn veisla til heiðurs Eyjólfi Árna Rafnssyni, forstjóra Mannvits, manni ársins í atvinnulífinu hjá Frjálsri verslun, var haldin á Hótel Sögu síðdegis þann 29. desember. Margt var um manninn og komu margir til þess að samfagna með Eyjólfi Árna, ættingjar, samstarfsmenn, vinir og fjölmargir leiðandi aðilar í viðskiptalífinu.

Jón G. Hauksson ritstjóri lýsti kjöri dómnefndar og því næst flutti Katrín Jakobsdóttir menntamálaráðherra stutt ávarp þar sem hún lýsti einangrun Skaftafellssýslna þar til verkfræðin hefði brúað bilin. Áður hefðu þar hvorki þrifist kettir, hundar né rottur. Hún afhenti Eyjólfi Árna svo viðurkenninguna og hann þakkaði fyrir sína hönd og fyrirtækisins með ræðu.

Loks komu þeir Sigtryggur Baldursson, Bogomil Font, söngvara og trommuleikari, Ástvaldur Traustason píanóleikari og Óttar Sæmundsen bassaleikari og skemmtu gestum með fjórum fallegum og hressilegum lögum sem lýstu stemningunni frá sveit til borgar. Á meðfylgjandi myndum má sjá að kátt var á hjalla og margir góðir gestir.

Hagt er að tvísmella á myndirnar til þess að stækka þær.

Benedikt Jóhannesson framkvæmdastjóri Heims stýrði veislunni.