vetrarbordi2010-02
leita

fv03-2011-forsida   

sky02-2011-forsida  

atlantica0211-cover 
20/12/2011 | 09:00

Jólavísbending og jólalag ársins
visbending_jol_2011Jólablað Vísbendingar er komið út. Efni er fjölbreytt að vanda.  Meðal efnis má nefna grein um Skúla fógeta en nú eru liðin 300 ár frá fæðingu hans. Skúli barðist fyrir því að Íslendingar ynnu sig út úr eymdinni, hann barðist fyrir verslunarfrelsi og fjölbreytilegu atvinnulífi. Hann fékk ekki góðar undirtektir undir hugmyndir sínar um breytingar. Bændum fannst ekki gott að þurfa að keppa um vinnuafl við nýtísku fyrirtæki. Svo fór að verksmiðjur Skúla í Reykjavík lognuðust út af en á endanum urðu hans baráttumál ofan á, frelsi náðist í verslun og þjóðin sneri sér að fjölbreytilegum atvinnurekstri. Stærstur hluti þjóðarinnar býr nú þar sem Skúli steig fyrstu skrefin úr miðöldum inn í nútímann.
 
Í blaðinu er líka grein um Stefánunga, Stephensen-ættina, sem varð vísir að íslenskum aðili fyrir um 200 árum. Segja má að þeir hafi tekið við forystu í íslensku þjóðlífi af Skúla. Þeir voru hinir merkustu menn, en íhaldssamir og höfðu ekki þann eldmóð sem einkenndi störf Skúla. Margir þeirra stuðluðu að uppfræðslu þjóðarinnar og voru praktískir menn. Margir hafa legið þeim á hálsi fyrir að leggja niður biskupsstóla á Hólum og í Skálholti á sama tíma og Alþingi var aflagt um 1800. Magnús Stephensen dómstjóri var raunsæismaður og taldi að þjóðin hefði ekki burði til þess að standa undir þessum fornu frægðarsetrum, auk þess sem hann áttaði sig á því að eðlilegt væri að færa valdstjórnina í fámennu landi á einn stað. Segja má að „valdatíma“ Stefánunga hafi lokið árið 1904 þegar Magnús Stephensen var síðasti landshöfðinginn til þess að láta af embætti.
 
Þórarinn Eldjárn fer skemmtilega yfir starf rithöfundarins. Hann minnir okkur á að nálgast verkefni ekki með yfirlæti: „Íslenska er ekkert merkilegra mál en danska og norska. En hún er okkar móðurmál. Hún er það sem við kunnum.“
 
Auk þess rifjum við upp kynni við tvo skuggalega fíra sem báðir voru til, þó að þeir hafi orðið mestir eftir að þeir dóu. Þeir Galdra-Loftur og Drakúla greifi hafa hvor um sig orðið uppspretta að þjóðsögum. Fáir átta sig eflaust á því að sagan af Drakúla var þýdd á íslensku áður en aðrir sáu ástæðu til þess að snúa henni á sín ylhýru mál. Loks birtist smásagan Íslenski kúrinn.  
 
Loks er að venju nýtt jólalag á sínum stað. Nótur að laginu má finna hér, en lagið sjálft má heyra með því að spila myndbandið  hér að neðan sem er myndskreytt af Páli Kjartanssyni.
 
Aðfangadagur
 
Blikar á himni, blástjarnan skín,
blessunar hátíð kallar til þín.
Kökubiti’ á diski, kerti  á vegg
karlinn jóla brosti, strauk svo sitt skegg.
 
Gleðileg jól, já gleðileg jól.
Guð gefi öllum gleðileg jól.
 
Kviknar á ljósum, kátt var svo allt
klukkan á veggnum sló hátt og snjallt.
Stelpan inní stofu steig upp á stól
stóð þar ein og sagði: Gleðileg jól!
 
Gleðileg jól, já gleðileg jól.
Guð gefi öllum gleðileg jól.
 
 
Share



Það hefur víst ekki farið fram hjá neinum að Jóhannes í Bónus ætlar að opna nokkrar Iceland verslanir á Íslandi með Malcolm Walker, eiganda keðjunnar í Bretlandi, og keppa m.a. við sitt gamla félag Bónus. Fyrsta verslunin er sögð opna á rauðum degi á almanakinu, 17. júní. Hratt flýgur fiskisaga og í þetta skiptið hefur hún ekki síður borist út vegna óvenjulegra rætinna ummæla Jóhannesar í garð Egils Helgasonar blaðamanns og fjölskyldu hans. Það verður að segjast eins og er að það er ómaklegt af Jóhannesi að  blanda fjölskyldu Egils inn í umræðunar þótt Egill geri á síðu sinni lítið úr Jóhannesi og endurkomu hans inn á markaðinn. Jóhannes skuldar Agli afsökunarbeiðni út af þeim ummælum. Það vekur að vísu furðu mína hvað mörgum finnst orð Jóhannesar fyndin, en svona er Ísland í dag; stjórnarfar og hugarfar á Íslandi hefur breyst eftir hrun. Það hefur verið gefið út veiðileyfi á allt og alla og þar fara ríkisstjórnin og stuðningsmenn hennar fremst í flokki.

benedikt09Í síðasta pistli var talað um þá niðurstöðu breskrar þingnefndar að þeir Murdoch feðgar væru óhæfir blaðaútgefendur. Þetta leiðir hugann að því hvernig ástandið sé og hafi verið hér á landi. Sjálfstæði fjölmiðla verður aðeins algert að sérhver starfsmaður geti leikið lausum hala og gert það sem honum sýnist.

Hægrikonan Marine Le Pen, sem varð þriðja í fyrri umferð forseta- kosninganna í Frakklandi hinn 22. apríl sl., segist ætla að skila auðu í seinni umferð kosninganna sem verður núna um helgina, sunnudaginn 6. maí. Le Pen hlaut 17,9% atkvæða í fyrri umferðinni. Ég staldraði við þegar hún sagðist ætla að skila auðu vegna þess að nýlega lenti ég í miklum rökræðum um hvað það merki að skila auðu í kosningum. Er það að vera hlutlaus og hafa enga skoðun? Felast í því skilaboð að láta aðra sjá um að ákveða þetta? Er einhver raunverulega „að kjósa“ að skila auðu?





© Allur rettur askilinn heimur.is (Heimur hf)
Heimur hf. Borgartúni 23 105 Reykjavik S. 512 7575 Fax. 561 8646 heimur@heimur.is