Tekjublað Frjálsrar verslunar er komið út og fæst í bókabúðum, matvöruverslunum, söluturnum og bensínstöðvum úti um allt land. Vegna úrskurðar Persónuverndar, áður Tölvunefndar, frá árinu 1995 verður blaðið aðeins í dreifingu í hálfan mánuð á meðan álagningarskrár liggja frammi almenningi til sýnis.

Það er margt sem stendur upp úr við lestur þess að þessu sinni. Þó fyrst og fremst það tekjur stjórnenda í atvinnulífinu hafa heldur dregist saman í kólnandi hagkerfi.

Tekjur yfir 3.000 einstaklinga eru birtar og þeirra á meðal eru stjórnendur allra helstu fyrirtækja landsins.

Tekjur 200 efstu forstjóranna í stærstu fyrirtækjum landsins drógust saman um rúmlega 200 þús. krónur á mánuði að jafnaði frá árinu 2009.

Árið 2010 er annað heila árið eftir hrun og hafa laun forstjóra og bankamanna dregist saman frá í fyrra en laun næstráðenda (millistjórnenda) og lækna standa nokkurn veginn í stað á milli ára – hafa dregist örlítið saman.

Tekjur stjórnenda í viðskiptalífinu hafa hins vegar lækkað verulega frá hinum miklu þensluárum 2006 og 2007. Bónusar og kaupaukar réðu þá miklu um tekjurnar en hafa stórlega dregist saman í stöðnuðu hagkerfi.

Landsframleiðslan dróst saman um 7 prósent árið 2009 og 4 prósent á síðasta ári. Eða um 11% eftir hrun. Um 14 þúsund einstaklingar eru atvinnulausir – auk þess hefur fjöldi fólks flutt af landi brott. Þetta hefur m.a. áhrif á að tekjur stjórnenda í viðskiptalífinu hafa almennt ekki hækkað á milli ára.

Meðaltekjur 200 efstu í fjórum flokkum

Árið              2010        2011 
Forstjórar               2,2 mkr.      2,0 mkr.
Starfsm. fjármf.     2,0 mkr.       1,5 mkr.
Næstráðendur      1,6 mkr.       1,7 mkr.
Læknar                 1,4 mkr.       1,4 mkr.

Tekjur starfsmanna fjármálafyrirtækja hafa dregist áberandi mest saman. Meðaltekjur 200 efstu eru um 1,5 milljónir á mánuði en voru tæpar 2 milljónir síðast.

Innan viðskiptalífsins hefur verið mikil umræða um að lítið sé að gerast í bankakerfinu, bankarnir láni lítið, hægt gangi að afskrifa skuldir fyrirtækja og skuldavandi heimila séu enn að mestu óleystur. Bankarnir högnuðust um 70 milljarða á síðasta ári og útlit er fyrir um 80 milljarða kr. hagnað á þessu ári.

Tekjur sjómanna hafa hækkað frá því í fyrra og njóta þeir góðs af falli krónunnar. Tíu efstu sjómennirnir voru með 3,2 mkr. á mánuði núna miðað við 2,8 mkr. í fyrra.

Tekjur Jóhönnu Sigurðardóttur forsætisráðherra voru 1.160 þús. krónur á mánuði í fyrra og hækkuðu um 84 þúsund kr. á milli ára.

Af um 3 þúsund einstaklingum í Tekjublaðinu eru 1.059 einstaklingar með hærri tekjur en Jóhanna, þar af 180 ríkisstarfsmenn en þeir voru 250 árið áður.

Ólafur Ragnar Grímsson, forseti Íslands, var með 1.562 þúsund á mánuði á síðasta ári, sömu mánaðartekur og árið áður. Jóhanna Sigurðardóttir, forsætisráðherra.

Davíð Oddsson, ritstjóri Morgunblaðsins, var tekjuhæstur fjölmiðlamanna, með 3.757  þúsund kr. á mánuði að jafnaði. Jón Kaldal, ritstjóri Fréttatímans, var með 1.585 þúsund og Haraldur Johannessen, ritstjóri Morgunblaðsins, var með 1.377 þúsund kr.

Tekjur skólamanna hafa oft verið í brennidepli. Háskólakennarar raða sér í efstu sætin. Tekjur tíu efstu í þeim flokki eru svipaðar á milli ára eða um 1,6 mkr. á mánuði og hundrað efstu skólamennirnir eru með um 929 þúsund kr. í tekjur að jafnaði.

Áberandi er hvað háskólakennarar eru með meiri tekjur en grunn- og framhaldsskólakennarar. Rektor MR er t.d. með 660 þús. krónur á mánuði.

Þetta er tuttugasta og þriðja árið í röð sem Frjáls verslun fjalla um tekjur einstaklinga út frá framlögðum álagningarskrám - og sextánda árið í röð sem gefið er út sérstakt Tekjublað.

Jón G. Hauksson