ÉG VERÐ MJÖG SJÁLFLÆGUR í þetta skipti – aldrei þessu vant. Það er enda ástæða til. Frjáls verslun fékk sérstaka fjölmiðlaviðurkenningu Jafnréttisráðs við hátíðlega athöfn á Hótel Sögu í gær. Þetta er mikill heiður fyrir blaðið og þökkum við öll sem stöndum að blaðinu fyrir okkur. Þessi viðurkenning er ekki veitt á hverju ári heldur eingöngu þegar tilefni þykir til.

AÐALVERÐLAUN JAFNRÉTTISRÁÐS hlaut Háskóli Íslands. Þar vó þyngst að kona var á árinu í fyrsta skipti kjörin rektor skólans, þegar Kristín Ingólfsdóttir, prófessor í lyfjafræði, var kjörin rektor sl. vor. Frjáls verslun óskar Kristínu og öllum starfsmönnum Háskóla Íslands til hamingju með Jafnréttisviðurkenningu Jafnréttisráðs fyrir árið 2005.

FRJÁLS VERSLUN var í upphafi sumars, sem og í fyrra, með sérstakt blað helgað konum í stjórnunarstörfum.  Þar var ítarlega úttekt á þeim konum sem sitja í stjórnum 150 stærstu fyrirtækja á Íslandi, auk þess sem blaðið valdi 70 áhrifamestu konurnar í atvinnulífinu. Þá birti blaðið lista yfir allar þær konur sem gegna starfi forstjóra í 300 stærstu fyrirtækjum landsins, auk fjölmargra annarra greina um konur, áhrif þeirra, tækifæri og störf í viðskiptalífinu.

OFTAR EN EKKI gengur umræðan út á að fjölmiðlar fjalli ekki nægilega mikið um störf kvenna og að körlum sé gert hærra undir höfði en konum. Þessu til stuðnings er yfirleitt vísað til mælinga og rannsókna um að fleiri fréttir séu af körlum en konum. Í ljósi þessa er það mikils virði og ánægjulegt fyrir Frjálsa verslun að fá þessa viðurkenningu Jafnréttisráðs. Í öllum tölublöðum okkar er fjallað um konur í stjórnunarstörfum, ekkert síður en karla.

Í ÞAKKARRÆÐU MINNI áréttaði ég að það væri bjargföst skoðun Frjálsrar verslunar að líta á stjórnendur og leiðtoga sem manneskjur – sem einstaklinga – án kynferðis, kynþáttar og litarháttar og að í störf stjórnenda séu ráðnir hæfustu einstaklingarnir. Umræðan um konur í viðskiptalífinu, konur í stjórnunarstörfum, konur í hlutverki leiðtoga og umfjöllun um samanburð á stöðu kvenna og karla í atvinnulífinu er hins vegar vinsælt umræðuefni og partur af jafnréttisumræðunni. Gleymum því samt ekki að engar tvær manneskjur eru eins. Margir karlar hafa engan áhuga á að stjórna eða vera í forystu. Það sama á við um konur. Þannig er það bara.

ÞAÐ KOM SKEMMTILEGA á óvart í umræðum við gesti eftir að viðurkenningarnar voru veittar að hið árlega Tekjublað Frjálsrar verslunar er orðið sterkt vopn kvenna við að biðja um hærri laun og jafna launamun kynjanna. Það er löngu vitað að „launaleynd“ heldur launum kvenna og karla niðri. Konur sögðu mér að þær vissu um margar konur í stjórnunarstörfum sem hefðu tekið Tekjublaðið með sér inn á teppi forstjóranna og krafist sömu launa og karlarnir sem þær ynnu með og væru í sambærilegum störfum og þær. Sannast þar enn og aftur það sem við höfum haldið fram að Tekjublað Frjálsrar verslunar er þarft upplýsingarit um vinnumarkaðinn á Íslandi.

FYRIRMYNDIR SKIPTA MÁLI í jafnréttisumræðunni. Konur í atvinnulífinu eru orðnar miklu sýnilegri í öllum fjölmiðlum en fyrir tíu til fimmtán árum. Sömuleiðis er miklu auðveldara fyrir fjölmiðla að fá konur í viðtöl en áður. Þær eru tilbúnar að stíga skrefin. Konur sem fyrirmyndir „brjóta ísinn“ á vinnumarkaðnum.

FRJÁLS VERSLUN verður 67 ára í byrjun janúar nk. Það hefur augljóslega margt áunnist í jafnréttisbaráttunni á þeim árum. Um það er mörgum blöðum af Frjálsri verslun að fletta.

Jón G. Hauksson