Ég hef alltaf jafngaman af því þegar birtar eru rannsóknir um að vín sé hollt. Hver kannast ekki við vísindin um að glas af rauðvíni á dag styrki hjartað. Í gamla daga var stundum talað um að fá sér eitthvað hjartastyrkjandi, en það var áður en rauðvín komst í tísku. Nýjastu tíðindin úr heimi vísinda og víndrykkju birtust í Mogganum í morgun. „Jarðarber eru góð fyrir heilsuna og neyti maður þeirra í formi kokkteils eru þau jafnvel enn hollari, samkvæmt nýrri rannsókn sem birt var  í tímaritinu Journal of the Science of Food and Agriculture. Áfengið virðist nefnilega auka andoxunareiginleika berjanna.“

Í jarðarberjafréttinni, sem ber yfirskriftina Gerir áfengi ávöxtinn hollari?, segir ennfremur að séu jarðarber sett í áfengi þá slái þau á sindurefni sem valdi „fjölda sjúkdóma“ og séu talin ein helsta ástæða öldrunar. Þá sagði að vínandi gerði brómberjum gott. Þarna var fréttin á góðglöðu róli. En þá var öllum að óvörum talað við einhvern dr. Frankie Phillips hjá bresku manneldissamtökunum og verður ekki annað sagt en að hann hafi „frankie-steinað“ fréttina því hann fór að vara við of mikilli áfengisneyslu. „Þótt þessi rannsókn bendi til þess að jarðarber í vínanda hafi aukna andoxunareiginleika þá hefur áfengi eftir sem áður klárlega frumuskemmandi áhrif.“

VÆNNA UM HROSS EN KÓPAVOGSBÚA. Önnur skemmtileg frétt í vikunni er auðvitað stríðið á milli Kópavogs og Garðabæjar. Það er komið í ljós að Garðbæingum þykir vænna um hross en fólk – eða að minnsta kosti þykir þeim vænna um hross en Kópavogsbúa. Gunnar Birgisson, bæjarstjóri í Kópavogi, fór í stórinnkaup fyrr í vetur þegar hann keypti svonefnt Glaðheimasvæði af hestamönnum í Gusti í Kópavogi – og græddi tvo eða þrjá milljarða á því, ef ég man þetta rétt. Allir eru núna ólmir í lóðir og vilja byggja og græða. En viti menn. Brugðið var fæti fyrir dr. Birgisson. Sagt var frá því að umhverfisráðuneytið hefði synjað staðfestingu á skipulagi þessa svæðis og að núna þurfi hugmyndir Kópavogsbæjar að fara fyrir einhverja samvinnunefnd um svæðisskipulag. En í þessari samvinnunefnd virðist mjög lítil samvinna því Gunnar Einarsson bæjarstjóri í Garðabæ, er ekki sáttur við hið nýja hverfi og segir að umferðaræðar á þessu svæði anni ekki þeirri auknu umferð sem fylgi byggð á Glaðheimasvæðinu. En aldrei kvörtuðu Garðbæingar yfir hrossunum í Glaðheimum. Það er því ekki gleði í Glaðheimum heldur stríð. Sem gamall Kópvogsbúi held ég með mínum manni. Það var gott að búa í Kópavogi!

Sættir í sjónmáli? Ég held að það finnist ekki lausn á stríðinu á milli Kópavogs og Garðabæjar nema þeir Gunnarar setjist niður um helgina og fái sér ávexti saman. Það hefur oft verið etið mikið af jarðarberjum í hesthúsahverfinu í Glaðheimum í gegnum tíðina. Stundum varð vegakerfið þarna meira að segja tvöfalt eftir mikið ávaxtaát og annaði allri umferð.

Af ávöxtunum skuluð þér þekkja þá!

Jón G. Hauksson

jgh@heimur.is