leita

ELDRI PISTLAR

Ekki er öll vitleysan eins. Það nýjasta er að stjórnir nýju bankanna, sem kosnar voru til bráðabirgða, tóku sjálfar ákvörðun um að kaupa öll skuldabréf í peningamarkaðsssjóðum bankanna þriggja sem fóru á höfuðið og borguðu um 200 milljarða króna fyrir bréfin til að rétta sjóðina að mestu við. Stjórnvöld

Það virðist alltaf vera vinsælt efni hjá blaðamönnum að skrifa listagreinar. Tíu skemmtilegustu menn Íslands, fimmtán hvítvín með silungnum, átta aðferðir til þess að lokka kærastann til þín aftur. Stundum er líka hringt í fólk og það spurt hvaða tíu manns, lífs eða liðna menn vildu fá í kvöldverðarboð. Ég

Nú er kvennafrídagur enn einu sinni. Ég get ekki að því gert að mér finnst það svolítið hallærislegt að taka sér frí til þess að leggja áherslu á kröfur. Konur eru mikilvægar í þjóðfélaginu og það tapa allir, og þar með þær, á því að taka sér frí. Mér


PISTLAR

11/05/2006 | 18:15

Dorrit kyrrsett í Ísrael (JGH)

Konan í ísraelsku landamæra- lögreglunni, sem kyrrsetti Dorrit Muoussaieff á einkaflugvelli í Ísrael, var örugglega að gera skyldu sína þegar hún stöðvaði forsetafrúna. Hún hefði að sjálfsögðu mátt sleppa dónaskapnum við Dorrit, en það er hins vegar algerlega óviðunandi að forsetafrú Íslendinga sé að ferðast í einkaerindum til Ísraels án þess að hafa tilskylda pappíra í lagi. Það er ekki nægileg reisn yfir því. Dorrit var kyrrsett á einkaflugvelli í Ísrael í tvær klukkustundir þegar hún var á heimleið eftir þriggja daga ferðalag um Ísrael.

 

Dorrit segir í viðtali við Morgunblaðið að hún hafi verið vöruð við því „að eitthvað þessu líkt gæti gerst þegar hún yfirgæfi landið og hafi hún því verið búin að hafa samband við ísraelska sendiráðið í Bretlandi. Þar hafi hún fengið loforð um að hún kæmist klakklaust úr landi.“

 

Af þessu má ráða að Dorrit hafi vitað að samkvæmt ísraelskum lögum verði fólk sem fætt er í landinu að bera ísraelsk skilríki. Eftir þessum lögum þarf Dorrit að fara eins og aðrir þótt hún sé breskur ríkisborgari, með breskt vegabréf og gift forseta Íslands.

 

Forsetafrúin er ekki íslenskur ríkisborgari og það hefur vakið undrun margra að hún ferðist um án þess að hafa diplómataskilríki á sér. Það verður bókstaflega að koma því þannig fyrir að hún fái slíkan passa – útilokað er að hún standi í stappi og ströggli á flugstöðvum.

 

Dorrit heldur upp á þriggja ára brúðkaupsafmæli sitt og Ólafs Ragnars Grímssonar, forseta Íslands, nk. sunnudag, 14. maí, á afmælisdegi forsetans. Þá getur hún sótt um íslenskan ríkisborgararétt. Ýmsir spyrja hvort sveigja hefði átt reglurnar gagnvart henni líkt og gert var í tilfelli Bobby Fischers og handboltamannsins „Dúndranúna“? Eflaust. En hefðu þá ekki einhverjir sprottið upp og gagnrýnt hana og eiginmanninn fyrir klíkuskap og að troðast framfyrir í röðinni? Það er vandlifað í henni veröld.

 

Fyrir einhverjum misserum var forsetafrúin gagnrýnd fyrir að fljúga í einkaþotu Baugs í för með Jóni Ásgeiri Jóhannessyni og ferðafélögum. Fannst mörgum ekki nægileg reisn yfir því að hún væri að fá far í Baugsþotunni með einum umsvifamesta kaupahéðni landsins. Stundum snýst ferðamáti um prinsipp.

 

Lögreglukonan í landamæraeftirlitinu var augljóslega hranaleg við Dorrit og fyrir það á hún sér engar málsbætur. Hins vegar má halda því fram að lögreglukonan hafi litið á það sem brandara og ögrun þegar hún fékk svarið frá Dorrit um að hún væri gift forseta Íslands og því væri breska vegabréfið hennar gefið út í Reykjavík. Ólafur Ragnar er ekki mjög þekktur maður í Ísrael – þótt hann kunni að vera orðinn það núna.

 

Vissulega var forsetafrúin í einkaerindum og á ferð með tveimur vinum sínum á leið um borð í einkaflugvél annars þeirra. Er það þá ekki hennar einkamál hvernig hún ferðast í sínum einkaerindum? Jú, sjálfsagt – þótt það sé ekki alveg sjálfgefið. Hún er forsetafrú allan sólarhringinn.

 

Íslendingar kunna að meta Dorrit. En passinn og pappírarnir verða hins vegar að vera í lagi. Forsetafrú Íslendinga á aldrei að geta lent í því að vera kyrrsett og standa í stappi við lögreglumenn í erlendum flugstöðvum og hóta þeim milliríkjadeilum.

 

Jón G. Hauksson

 

jgh@heimur.is

 

Share




© Allur rettur askilinn heimur.is (Heimur hf)
Heimur hf. Borgartúni 23 105 Reykjavik S. 512 7575 Fax. 561 8646 heimur@heimur.is