Prófkjör Samfylkingarinnar var um helgina. Borgarstjórinn sendi mér bréf á föstudaginn um að ég mætti kjósa. Þrátt fyrir að prófkjörið var byggt upp í kringum það að allir mættu kjósa og þyrftu hvorki að vera í Samfylkingunni né styðja hana kusu aðeins rúmlega níu þúsund manns. Á Akureyri, Ísafirði og Álftanesi fengu bæjarstjórar yfirgnæfandi traustsyfirlýsingu. Í Reykjavík var borgarstjóranum hafnað.

Ég velti því fyrir mér hvers vegna fjölmiðlar fjalla lítið um aðalfréttina í þessu prófkjöri sem er auðvitað að sá sem R-listinn hefur valið sem leiðtoga sinn, borgarstjórinn sjálfur, lendir í öðru sæti. Ástæðan er kannski sú að skoðanakannanir höfðu sýnt þetta fyrir löngu. Engu að síður vekur það athygli að eftir kosningabaráttu sem kostaði Reykvíkinga tugi milljóna króna í launum til leikskólastarfsmanna. Greinilega hefur þessi ómerkilega brella dugað til þess að fleyta borgarstjóranum í annað sætið, en það er háttur lýðskrumara að beita sér fyrir útgjöldum en hafa ekki áhyggjur af því hvernig fjár er aflað. Enn grímulausari var notkun á fjármunum borgarinnar til þess að auglýsa viðtalstíma borgarstjóra með stórri mynd. Borgarstjórinn veit sem er að kjósendur muna ekki mikið eftir skuldasúpu R-listans á kjördegi.

Út um allt land fengu bæjarstjórar Sjálfstæðismanna mikla traustsyfirlýsingu. Fyrir skömmu gerðist það sama á Seltjarnarnesi og í Kópavogi. En R-listanum gengur ekkert að finna foringja. Þegar Ingibjörg Sólrún bauð sig fram til borgarstjórnar árið 1994 hæddist hún að Sjálfstæðismönnum sem hefðu haft þrjá foringja á kjörtímabilinu, Davíð, Markús og Árna. Sjálf hafði hún alltaf þennan hátt á með Alfreð sem yfirforingja og Árna aukaforingja. Munurinn var sá að R-listinn hafði þrjá foringja samtímis. Opinberlega var Ingibjörg þó alltaf foringinn þó að hún gætti þess að hringja í Alfreð oft á degi hverjum.

Nú bregður svo við að fjórði opinberi foringinn á kjörtímabilinu er kominn fram. Ingibjörg Sólrún varð að víkja úr stól borgarstjóra eftir að hún sveik loforð sitt um að gefa sig óskipta að borgarmálunum og fór í framboð til þings þar sem hún náði reyndar ekki kjöri. Síðan hefur hún verið eins og vængbrotin og í þessu prófkjöri reyndi hún að láta líta svo út að hún styddi alla frambjóðendur í fyrsta sæti. Þórólfur Árnason átti stuttan feril og eftir miklar vangaveltur var ákveðið að velja þann Samfylkingarmann sem fæstir þekktu í hans stól. Samfylkingarmenn hafa nú ákveðið að sparka í borgarstjórann, hafna honum í prófkjöri og velja geðþekkan utanflokksmann hans í stað.

Það er stórfrétt að borgarstjóranum er hafnað. Fjölmiðlar hafa hins vegar misst af aðalfréttinni, kannski vegna þess að þeir mundu aldrei almennilega hver var borgarstjóri.

Benedikt Jóhannesson