Ég fæ ekki betur séð en að frjálslyndir hafi dottið í lukkupottinn og fundið málstaðinn sem alveg steinliggur í næstu kosningum: Að herða og takmarka reglur gagnvart útlendingum sem vilja flytjast til Íslands og setjast hér að. Ef frjálslyndir fengju svo Ómar Ragnarsson umhverfissinna til að leiða listann í Reykjavík þá er eins gott fyrir aðra flokka að vígbúast af fullri alvöru. Bæði málin ganga út á að varðveita íslenska náttúru.

Það var athyglisverð grein sem Jón Magnússon, fyrrverandi formaður Nýs afls og núverandi liðsmaður frjálslyndra eftir sameininguna, skrifaði í Blaðið á dögunum. Þar sendi hann tóninn. Hann var einfaldlega sá að ekkert kontról væri með flutningi útlendinga til landsins. Því væri nauðsynlegt að spyrna við fótum og takmarka reglur, halda utan um þetta og stýra þessu. Niðurstaða: Annars verði Íslendingar orðnir 400 þúsund fyrr en varir og þar af 100 þúsund innflytjendur. Ergó: Viljum við þetta?

Stíflan brast eftir þessa grein Jóns Magnússonar. Málefni innflytjenda hafa verið rædd á öllum kaffistofum í þessari viku og sitt sýnist hverjum. Símalínur útvarpsstöðvanna hafa verið rauðglóandi og það hefur ekki farið fram hjá neinum að Íslendingar hafa verulegar áhyggjur af framvindu mála og virðast ekki vilja að tugþúsundir útlendinga streymi til landsins og leggi íslenska tungu og íslenska menningu að velli – rétt sísvona.

Þegar Fréttablaði birti svo skoðankönnun sína um að Frjálslyndi flokkurinn mældist með 11% fylgi samkvæmt könnuninni og fengi 7 þingmenn fór að renna tvær grímur á þingmenn annarra flokka – sem og á Guðjón A. Kristjánsson, sjálfan formann Frjálslynda flokksins. Guðjón, sem hefur verið giftur pólskri konu í átján ár og er því málið skylt, hefur hamast við að telja öllum trú um að málflutningur Frjálslynda flokksins hafi verið rang- og oftúlkaður. Þeir séu engir rasistar og ali ekki á útlendingahatri og fordómum heldur hafi þeir svipaða stefnu og aðrir flokkar sem sé sú að bjóða útlendinga velkomna til landsins, bæta aðstöðu þeirra, líta á þá sem Íslendinga en ekki gesti, og kenna þeim íslensku.

Miðað við það hvernig Guðjón A. Kristjánsson hefur talað þá segir hann fyrr af sér formennsku í Frjálslynda flokknum en að gera málefni innflytjenda að helsta kosningamáli flokksins. Kvótinn er hans mál. Það gæti því allt eins verið í kortunum að frjálslyndir klofni.

Útlendinar streyma til landsins. Samkvæmt Vinnumálastofnun fengu tæplega 4 þúsund manns hér atvinnuleyfi á síðasta ári, þar af 70% frá hinum 8 nýju aðildarríkjum í Evrópusambandinu sem flestar eru austur-evrópskar. Þá hafa ríflega 7 þúsund erlendir starfsmenn komið til landsins það sem af er þessu ári og Vinnumálastofnun segir að um 2 þúsund erlendir starfsmenn hafi ekki verið tilkynntir til stofnunarinnar eins og lög kveða á um.

Getur Frjálslyndi flokkurinn gert þetta að kosningamáli? Segir ekki í EES-samningnum að það sé frjálst flæði vinnuafls innan svæðisins, frjálst flæði fjármagns og frjálst flæði  vöru og þjónustu á milli landa? Hvað er þá málið? Verðum við ekki að virða EES? Jú, en það breytir því ekki að frjálslyndir hafa komið við viðkvæman blett á kjósendum sem eru ekki allir þar sem þeir eru séðir. Ennfremur sýnist stór gjá á milli þjóðar og þings í þessu máli.

Auðvitað væri ekki hægt að reka íslenskt þjóðfélag án innflyjenda. Þeir halda uppi fiskvinnslunni. Þeir eru uppistaðan í umönnun við gamla fólkið á elliheimilum. Þeir annast ræstingarnar á sjúkrahúsunum. Þeir eru drjúgur hluti iðnaðar- og verkamanna í byggingargeiranum. Þeir eru í láglaunastörfum sem Íslendingar nenna ekki lengur að vinna við. Og þeir eru ekki hér sem gestir heldur virkir þátttakendur í atvinnulífinu.

Það breytir samt ekki því að málflutningur Frjálslynda flokksins á upp á pallborðið hjá mörgum Íslendingum. Ég segi alveg eins og er að ef frjálslyndir fengju græningjann og umhverfissinnann Ómar Ragnarsson til að leiða listann í Reykjavík þá yrði ekki annað séð en kominn væri 15 til 20 prósenta flokkur - sem gerði út á að vernda íslenska náttúru.

Kannski er fylgi Frjálslynda flokksins og umræðan um málefni innflytjenda bóla sem springur og grær. En þangað til er engin ástæða til fyrir aðra flokka að vanmeta skilaboðin sem könnun Fréttablaðsins sýnir. Sumir gætu hæglega verið að þurrkast út.

Jón G. Hauksson

jgh@heimur.is