leita

ELDRI PISTLAR

30. nóvember | Mikið þrek (BJ)
Á Alþingi mánudaginn 29. nóv. voru umræður um ummæli Hjálmars Árnasonar í Silfri Egils daginn áður um lista hinna staðföstu þjóða. Utanríkisráðherra afgreiddi málið með snyrtilegum hætti. Hann sagði: „Herra forseti. Það á sér hvergi í heiminum stað umræða af þessu tagi nema hér. Að taka landið af listanum

07. nóvember | Meðal blámanna (BJ)
Líklega hef ég aldrei verið eins kvíðinn fyrir ferðalag eins og áður en ég fór til Afríku. Spenntur og kvíðinn er líklega réttara. Svo þegar maður kom á staðinn var ljóst að meðan maður hélt sig á réttum stöðum á réttum tíma var ekki hættulegra að vera þar en

Það hefur víst ekki farið fram hjá neinum að Jóhannes í Bónus ætlar að opna nokkrar Iceland verslanir á Íslandi með Malcolm Walker, eiganda keðjunnar í Bretlandi, og keppa m.a. við sitt gamla félag Bónus. Fyrsta verslunin af nokkrum er sögð verða opnuð á rauðum degi á almanakinu, 17.


PISTLAR

27/03/2009 | 15:11

Tími Bjarna kemur 2013 (JGH)

Ég geri ráð fyrir að Bjarni Benediktsson verði kosinn nýr leiðtogi Sjálfstæðis- flokksins um helgina. En hans bíður tröllvaxið verkefni; að byggja flokkinn upp og auka vinsældir hans í mjög svo stuttri kosningabaráttu. Flokkurinn verður helst að fá 35% fylgi í komandi Alþingiskosningum svo Bjarni tryggi sig í sessi sem leiðtogi. Einhver kynni að segja að 30% væru í lagi fyrir hann, jafnvel kalla það varnarsigur. En 25% fylgi, eins og flokkurinn mælist núna með, gerði Bjarna mjög erfitt fyrir. Það væri jafnvel hægt að túlka það sem persónulega útreið fyrir hann þótt jábræður hans segðu eflaust að þetta væri ekki honum að kenna heldur bankahruninu og stjórnarsetu flokksins í átján ár.

Staðan er þessi: Það bendir ekkert til annars en að Samfylking og Vinstri grænir myndi næstu ríkisstjórn og það án aðstoðar Framsóknarflokksins sem horfir mjög til vinstri um þessar mundir. Það verður vinstri stjórn; eingöngu spurning hvort hún verður tveggja eða þriggja flokka. Þessir flokkar munu halda Sjálfstæðisflokki utan við næstu stjórnarmyndun. Þeir hafa einsett sér það og ástarbréfin ganga á milli Vinstri grænna og Samfylkingar. Sigmundur Davíð hefur ekki fengið „loveletter“ og kallar  Samfylkinguna því „loftbóluflokk“.

Jóhanna Sigurðardóttir, sem verður 67 ára í haust og þar með löggiltur pensjónisti, verður næsti forsætisráðherra. Jóhanna sagði nýlega að hún hefði í upphafi þessa kjörtímabils litið á þetta sem sitt síðasta kjörtímabil; hún hefði gert ráð fyrir að draga sig í hlé frekar en að búa sig undir sín mestu átök sem stjórnmálamaður. Jóhanna verður hyllt á landsfundi Samfylkingar um helgina sem nýr formaður flokksins. Þar er mesta spennan um varaformennskuna. Sú kosning er hin raunverulega formannskosning.

Steingrímur J. Sigfússon, sem verður 54 ára í sumar, er enn í fullu fjöri þótt margur vinstri græninginn hafi verið farinn að líta í kringum sig og skima eftir nýjum formanni þegar góðærið stóð sem hæst. Steingrímur hefur setið samfellt á þingi í 26 ár og verður örugglega áfram fjármálaráðherra í nýrri vinstri stjórn.

En hvaða möguleika á þá Bjarni Benediktsson í stöðunni? Sárafáa. Hann verður að una því að hans tími komi í kosningunum 2013. Þess vegna skiptir það hann svo miklu máli að Sjálfstæðisflokkurinn fái 35% fylgi í kosningunum því það yrði afgerandi byr fyrir Bjarna til að vinna heimavinnuna og byggja flokkinn upp á næstu árum. Spurningin er auðvitað hvort Bjarni og sjálfstæðismenn hafi þolinmæði í það verk – svo vanur er flokkurinn stjórnarsetu. En það skiptir öllu máli fyrir Bjarna að nýta tímann vel til að endurnýja andann í flokknum, innleiða frískleg vinnubrögð og gera upp við fortíðina. Því fyrr, því betra.

Ef til vill verða stjórnarslit og kosningar áður en 2013 rennur upp. Sú vinstri stjórn, sem tekur við eftir kosningarnar, mun eiga mjög erfitt verk fyrir höndum og hún gæti hæglega sprungið eftir tveggja til þriggja ára setu. Í raun hefur núverandi vinstri stjórn ekki gert neitt afgerandi í efnahagsmálum þótt hún hafi frísklegt yfirbragð sem gefur henni fylgi í könnunum. Hún hefur ekki komið með neitt örvandi útspil til að hleypa lífi í atvinnu-lífið enda svosem haft lítinn tíma til. Hér er ennþá mesta kreppa í heimi, hæstu vextir, heftandi verðtrygging og hörð gjaldeyrishöft.

Hugarfarið og andrúmið skiptir máli eftir næstu kosningar. Það verður ekki til að hleypa lífi í atvinnu-lífið og blása fólki baráttuanda í brjóst þegar ný vinstri stjórn byrjar að hækka skattprósentu á einstaklinga (sem mun hugsanlega leiða til minni skatttekna).

Þegar rætt er um pólitík og efnahagsmál endar yfirleitt öll umræða í öngstræti ónýtrar krónu. Menn komast ekki lengra. Þess vegna er það eitt af forgangsverkefnum nýrrar ríkisstjórnar að ákveða að skipta um gjaldmiðil því það ferli tekur tíu ár. Ekki virðist mikill áhugi innan flokkanna að taka þá ákvörðun þótt atvinnulífið hrópi hátt eftir þeirri niðurstöðu.

Leppstjórnir. Annars má velta því fyrir sér hvort kosningarnar 25. apríl skipti svo miklu máli. Alþjóðagjaldeyrissjóðurinn stjórnar í raun landinu. Núverandi stjórn er leppstjórn sjóðsins og næsta vinstri stjórn verður það líka. Þjóðin er kefluð í spennutreyju þessa sjóðs sem hamlar frekar en hjálpar á meðan hann heldur hér uppi hæstu vöxtum í heimi í hörðustu kreppu í heimi. Mafían vinnur ekki einu sinni svona.

Jón G. Hauksson
jgh@heimur

Share




© Allur rettur askilinn heimur.is (Heimur hf)
Heimur hf. Borgartúni 23 105 Reykjavik S. 512 7575 Fax. 561 8646 heimur@heimur.is