Margir velta því fyrir sér hvort nokkurt vit sé í því að einn maður fái tugi milljóna í laun á mánuði. Stundum einkennist umtalið af öfund, stundum af pólitík. En er það vont fyrir samfélagið að einhverjir fái mjög há laun? Þeir sem hæstu launin hafa borga líka hæstu skattana. Þannig leggja þeir líka mikið í samneyslu. Hæsti skattgreiðandi landsins vegna ársins 2006 er Hreiðar Már Sigurðsson forstjóri Kaupþings. Hann greiðir um 400 milljónir til samfélagsins. Það er ástæða til þess að óska Hreiðari til hamingju með þennan árangur. Miklar tekjur hans endurspegla góðan árangur Kaupþings innan lands og utan. Það er gleðiefni að sjá hve fyrirtækið hefur vaxið og dafnað á undanförnum árum. Auk þess er það ánægjulegt að sjá að hve þessi forystumaður í atvinnulífinu leggur myndarlegan skerf til samfélagins. Fyrir þessa fjárhæð má reka embætti umboðsmanns barna, Þjóðmenningarhúsið, Minningarsafn um Halldór Laxness á Gljúfrasteini, fasteignir forsætisráðuneytisins, Vest-Norrænt menningarhús í Kaupmannahöfn, Óbyggðanefnd, Ríkislögmann og þjóðgarðinn á Þingvöllum.

Í stað þess að agnúast út í há laun er miklu meiri ástæða til þess að þakka þeim einstaklingum sem ákveða að halda búsetu hér á landi og leggja myndarlegan skerf til uppbyggingar hér á landi þó að þeim væri eflaust í lófa lagið að fela sig í einhverri skattaparadís. Það var ótrúleg bíræfni þegar þekktur viðskiptajöfur sagðist hafa flutt til útlanda vegna þess að skólakerfið væri ekki nógu gott á Íslandi. Hvað skyldi hann sjálfur hafa lagt til þess kerfis? Ekki krónu í tekjuskatt því að hann reiknaði sér ekki nema örfáa tugi þúsunda í laun.

Nú á tímum er það nefnilega svo að það eru ekki bara einstök byggðarlög sem vilja halda í einstaklingana, þjóðfélagið allt á í ákafri samkeppni við umheiminn um hæfustu einstaklingana. Það geta verið margar ástæður fyrir því að menn setjast að erlendis. Íslendingar keppa ekki um veður við Miðjarðarhafslönd. En við getum keppt með hagstæðu skattaumhverfi, fjölbreyttri menningu og traustum heilbrigðis- og menntakerfum. Þeir sem fá há laun stuðla að góðu umhverfi hér á landi með háum skattgreiðslum.

Ef allir þeir sem bestar hafa tekjurnar hrekjast úr landi eða fela launin í eignarhaldsfélögum tapar íslenskt samfélag. Tekjuskiptingin verður jafnari, en tekjurnar í heild verða miklu minni. Líður einhverjum betur við það?

Benedikt Jóhannesson