Microsoft á Íslandi hefur útnefnt fyrirtækin EJS og Landsteina Streng sem samstarfsaðila ársins 2008. EJS hlýtur nafnbótina í hópi fyrirtækja sem starfa að kjarnalausnum Microsoft en Landsteinar Strengur fyrir viðskiptalausnir Microsoft.

Viðurkenningarnar eru veittar fyrir framúrskarandi árangur í þróun, þjónustu og sölu Microsoft-lausna á síðasta fjárhagsári Microsoft. Fjórir samstarfsaðilar til viðbótar hlutu viðurkenningu á verðlaunaafhendingu Microsoft á Íslandi sem fram fór fyrir skömmu. Fyrir kjarnalausnir voru Opin kerfi og NTV verðlaunuð auk EJS og fyrir viðskiptalausnir hlutu Annata, LS Retail og Maritech verðlaun.

Hulda Kristín Guðmundsdóttir, viðskiptaþróunarstjóri samstarfsaðila Microsoft Íslandi, Halldór Jörgensson, framkvæmdastjóri Microsoft Íslandi, Örn Þór Alfreðsson, framkvæmdastjóri búnaðarsviðs EJS og Jóhann Áki Björnsson, viðskipta- og vöruþróunarstjóri EJS.

Sigurjón Pétursson, framkvæmdastjóri Landsteina Strengs, og Halldór Jörgensson, framkvæmdastjóri Microsoft Íslandi.

Fram kom við verðlaunaafhendinguna að íslensk fyrirtæki hafi að undanförnu vakið sérstaka athygli á alþjóðavísu fyrir þróun Microsoft Dynamics viðskiptalausna.

Í sumar fengu tvö íslensk fyrirtæki, Landsteinar Strengur og LS Retail, inngöngu í svokallaða „Inner Circle Club“ og „President’s Club“ hópa Microsoft-samstarfsaðila í viðskiptalausnum, auk þess sem Maritech hefur komist í President’s Club tvö ár í röð.

Einungis allra bestu samstarfsaðilar Microsoft á alþjóðavísu fá inngöngu í þessa hópa og er það talið með eindæmum að þrjú fyrirtæki frá Íslandi nái svo góðum árangri.

„Þessi árangur sýnir svo ekki verður um villst að íslensk upplýsingatækni er á heimsmælikvarða,“ sagði Halldór Jörgensson, framkvæmdastjóri Microsoft á Íslandi, við verðlaunaafhendinguna.
 
„Landsteinar Strengur, LS Retail, Maritech og Annata hafa þróað viðskiptalausnir sem hafa náð verulegri útbreiðslu á alþjóðlegum mörkuðum og eftir því er sérstaklega tekið í höfuðstöðvum Microsoft að íslensk fyrirtæki standi svo framarlega á þessu sviði,“ bætti hann við.

„Þar að auki hafa EJS, Opin kerfi og NTV náð frábærum árangri við að aðstoða íslensk fyrirtæki við að nýta kjarnalausnir Microsoft til hins ítrasta,“ sagði Halldór að lokum.