Alan Turing fæddist á Englandi þann 23. júní árið 1912. Foreldrar hans bjuggu samt sem áður á Indlandi þar sem faðir hans vann á vegum bresku krúnunnar. Þegar móðir Alans varð ófrísk sneri hún til Englands til að fæða son sinn en skildi hann síðan eftir í umsjá vinafólks svo hún gæti snúið aftur til eiginmanns síns á Indlandi. Það féll því að mestu í hlut heimavistarskóla að ala drenginn upp. Hann sýndi fljótt afburða hæfileika á sviði stærðfræði og innritaðist árið 1931 til sérhæfingar í greininni í háskólann í Cambridge. Turing skaraði fram úr í skóla en þótt einkar sérlundaður í augum samnemenda sinna: hann rakaði sig sjaldan, fór oft einförum og þótti fátt skemmtilegra en að fara einn í langa hjólareiðatúra í skógi í námunda við skólann. Þekktist hann umsvifalaust af stórri vekjaraklukku sem hann límdi við annan handlegg sinn til að taka tímann á hjólreiðatúrnum og þó sérstaklega af gasgrímunni sem hann hafði á höfðinu til að verjast frjókornaofnæminu sem hrjáði hann stöðugt.

Byltingarkenndar hugmyndir
Á fyrri helmingi tuttugustu aldar var mikill uppgangur á sviði stærðfræði í háskólum á Vesturlöndum og voru námsárin í Cambridge því afskaplega gefandi tími fyrir hinn unga Alan Turing. Fékk hann fljótt ástríðu á hagnýtri stærðfræði og rökfræði og á síðasta misseri hans í skólanum birtist eftir hann ritgerð þar sem hann sýndi fram á að formúlur stærðfræðinnar væru óumbreytanlegar setningar sem hvorki væri hægt að sanna né afsanna. Til stuðnings röksemdarfærslu sinnar skrifaði Alan sérstakan kafla þar sem hann reifaði hugmyndir sínar um vél sem átti að geta unnið með hvaða tölur sem var. Vél þessi, sem innihélt stjórnborð og eigið innra minni, átti samkvæmt Turing að geta unnið einfaldari færslur með því að lesa upplýsingar af bandi og eyða þeim af sjálfsdáðum. Þetta voru að sönnu byltingakenndar hugmyndir og með öllu óvíst hvaða augum kennarar hans litu þennan undradreng.

Dulmálsfræði í hernum
Árið 1936 hóf Turing doktosnám við Princeton háskólann í Bandaríkjunum undir handleiðslu hins þekkta stærðfræðings John von Neumans en hann þoldi landsmenn illa og sneri því samstundis aftur til heimalandsins með doktorsgráðuna í vasanum árið 1938.   Ári síðar braust seinni heimsstyrjöldin út. Alan gekk til liðs við breska herinn og var hann samstundis sendur til Bletchley Park þar sem öflugur hópur stærðfræðinga var kominn saman til að ráða í dulmál Þjóðverja. Þetta voru gefandi tímar enda samstarfsfólk hans af sama vettvangi og verkefnið krefjandi. Annars fannst Turing verkefnið ofurlétt enda höfðu breskir njósnarar komist yfir teikningar af dulmálsvél Þjóðverja áður en stríðið braust út og smíðað sína eigin útgáfu á vélinni sem bjó dulmálið til og náðu þeir þannig að þýða hver einustu skilaboð sem leynimakkar nasista sendu sín á milli. En verkið mátti vinna hraðar og var Turing falið að þróa hraðvirkari dulmálsvél sem hraðað gæti þýðingum á merkjasendingum Þjóðverja um meira en helming. Það tókst og var afraksturinn gríðarstór vél sem hægt var að forrita að vild og gekk undir hinu viðeigandi nafni: Colossus. Að heimsstyrjöldinni lokinni veitti drottning Englands Alan Turing og félögum hans heiðursorðu bresku krúnunnar fyrir störf sín. En Alan var síður en svo sestur í helgan stein. Hann hélt ótrauður áfram að þróa dulmálsvélina og óraði fáa ef enga fyrir þeim áhrifum sem hún átti eftir að hafa fyrir ókomna framtíð.