Árið 1999 krýndi bandaríska tímaritið Time Jeff Bezos, stofnanda Amazon.com, konung netverslunarinnar. Krýning Bezos var umdeild enda fjárfestar æfir vegna gríðarlegs taps fyrirtækisins. En Bezos sat fast við sinn keip og á síðasta ári skilaði Amazon.com meiri hagnaði en nokkru sinni fyrr.
Saga Amazon.com er sem ævintýri líkust. Fyrirtækið opnaði rafrænar dyr sínar í júlímánuði 1995 og strax ári síðar voru daglegir gestir orðnir 2000. Ári síðar hafði sú tala tuttugufaldast. Að sama skapi jókst veltan úr 511.000 dollurum frá opnunarárinu í 147 milljónir dollara árið 1997. Það sama ár fóru bréf í fyrirtækinu á opinn markað, en hluturinn seldist á litla 18 dollara. Tveimur árum síðar stóðu bréfin í hvorki meira né minna en 100 dollurum! Uppgangurinn var ótrúlegur.
En annað og meira var í vændum. Ekki aðeins gjörbreytti tilkoma Amazon.com verslunarháttum á Netinu heldur sannaðist að hægt var að skemmta sér við netinnkaupin. Með aukinni umferð um vef Amazon.com bættust fljótlega við fleiri möguleikar: t.a.m. gátu notendur gagnrýnt ákveðna vöruflokka, séð hvað aðrir notendur með svipuð áhugamál keyptu í versluninni og svo má lengi telja. Og merkilegt nokk! Með því að gera umhverfi rafrænnar netverslunar notendavænna og gagnvirkara leið notendum umsvifalaust betur. Þetta töfrabragð Amazon.com laðaði til sín fleiri notendur en samsvarandi bókabúðir, t.a.m. Barnes and Noble - og viðskiptavinirnir komu aftur og aftur!
Það var greinilegt að Amazon.com hafði unnið áfangasigur í netbyltingunni enda sýndu skoðanakannanir að í flestum tilvikum keyptu netverjar sína fyrstu vöru á vef Amazon.com. Þegar sala á tónlistarefni bættist við sívaxandi vöruflokka á vef Amazon.com sumarið 1998 fjölgaði vipskiptavinum fyrirtækisins enn frekar - í lok ársins var Amazon.com langsamlega söluhæsti aðili á sviði tónlistar á Netinu.
Vöxtur fyrirtækisins og uppgangur virtist endalaus; rjúkandi gengi þess í bland við ótrúlega bjartsýni fjárfesta auðveldaði án efa samningagerð Jeff Bezos þegar hann vildi fjölga vöruflokkum með samstarfssamningum við fjölda fyrirtækja snemma árs 1999.
Þetta var annasamt ár og fjöldi undirvefja bættust við: notendur gátu nú í fyrsta sinn, auk bóka og tónlistar, keypt lyf og bíla og fengið þá keyrða heim að dyrum. Til að tefla gegn uppboðsvef e-bay.com bættist síðar við uppboðsvefur í samstarfi við hið heimskunna fyrirtæki Sothebys.
Saga Amazon.com minnir um margt á ævintýri eftir Grimmbræður. En í þessari sögu átti prinsinn enn eftir að ganga yfir þyrnum stráða braut til að ná markmiði sínu. Jeff Bezos gat ekki með nokkru móti látið staðar numið þrátt fyrir óvenju gott gengi fyrirtækisins. Þvert á móti taldi hann nauðsynlegt að stækka fyrirtækið enn frekar og í kjölfarið opnuðu staðbundnar vefgáttir Amazon.com víða um heim, í Kanada, Japan, Frakklandi, Þýskalandi og á Englandi. Þetta var stórt stökk, enda var sérhver vefjanna á móðurmálum landsmanna.
Stækkun Amazon.com var ærið kostnaðarsöm fjárfesting og lét hagnaður standa á sér ár eftir ár. Hluthafar urðu ævareiðir, sögðu margir að ef hlustað yrði frekar á Bezos yrði þess stutt að bíða þar til Amazon.com yrði lýst gjaldþrota. þegar til tals kom að auka hlutafé enn frekar afréðu margir hluthafa að selja fremur bréf sín en að halda þeim. En þegar öllu var á botninn hvolft reyndist sú ákvörðun heldur en ekki jákvæð fyrir fyrirtækið. Seljendur fengu að vísu gott verð fyrir bréfin, sumir fengu nálægt hundrað milljónum dollara, en það var ekkert í líkingu við það sem ?eir hefðu fengið hefðu þeir haldið að sér höndum.
Róðurinn þyngdist því nokkuð frá árslokum 1999 til sumars 2001. En þótt hagnaður framan af léti á sér standa jókst veltan með tímanum. Netverslun staðbundinna vefgátta Amazon.com jókst til muna og náði hún í fyrsta sinn hámarki jólin 2002. Á þessu ári er svo búist við enn öðrum toppi, eða hækkun um 15 prósent milli ára. Og eitt er víst. Ævintýrið um Amazon.com mun halda linnulaust áfram.
Lætur Tölvuheimur þar með lokið í bili frásögninni af Jeff Bezos og uppgangi Amazon.com sem hafin var í fyrsta tölublaði ársins. Eflaust verður tilefni til að taka upp þráðinn síðar.
