Árið 1994 sagði Jeff Bezos upp öruggu starfi, pakkaði búslóðinni inn í bíl og ók með eiginkonunni þvert yfir Bandaríkin. Þau stöðvuðu bílinn í Seattle, leigðu hús og tengdu tölvuna. Ári síðar seldu þau fyrstu bókina í gegnum netverslun sína, Amazon.com.
Uppfinningasamur unglingur
Jeff Bezos kom í heiminn í Nýju-Mexíkó árið 1964. Strax í æsku fékk hann ódrepandi áhuga á tækjum og tólum heimilisins. Foreldrum sínum til mikillar armæðu átti hann til að taka þau í sundur og setja svo saman á ný, oftast með misjöfnum árangri. Faðir hans og afi voru báðir menntaðir í eðlisfræði; faðir hans starfaði hjá olíurisanum Exxon en afinn, sem á þessum árum var sestur í helgan stein, hafði starfað sem kjarneðlisfræðingur. Þegar Jeff var fjórtán ára ákvað hann að feta í fótspor feðra sinna. Hann lagði hart að sér í eðlis- og efnafræði jafnt innan sem utan veggja skólans og gramdist foreldrum hans heldur en ekki þegar hann tók að sanka að sér ýmsum tólum og tækjum og hlaða inn í bílskúr heimilisins. Dvaldi hann þar oft lengi við "vísindastörf" og gerði meðal annars heldur misheppnaða tilraun til að smíða svifnökkva frá grunni sem gekk fyrir gamalli ryksugu. En ástríða hans bar að lokum ávöxt í formi kubbs er hann kallaði: Kubburinn endalausi. Kubbur þessi samanstóð af rafknúnum speglum sem snerust og þegar notandi horfði inn í hann í gegnum lítið gat, sýndist kubburinn sem endalaus og vakti hann að sögn verðskuldaða kátínu í fjölskyldunni. Á sumrin dvaldi Bezos svo á búgarði afa síns í Texas og notaði hann hvert tækifæri sem gafst til að kynna sér gerðir og virkni ýmiss konar tæknibúnaðar auk þess að gera við sem þurfa þótti.
Smíði kerfis utan um fjármálasjóði
Nám í verk- og tölvufræði við Princeton háskólann var rökrétt afleiðing af því sem á undan gekk, og árið 1986 útskrifaðist hann með hæstu einkunn. Í kjölfarið fékk Bezos starf hjá FITEL, litlu tölvufyrirtæki í New York sem framleiddi ljósleiðara, en var nokkru síðar boðið að gerast yfirmaður þróunardeildar Bankers Trust Company í New York. Árangurinn var háþróað tölvukerfi sem hélt utan um fjármálasjóði fyrirtækisins og hlaut Bezos fyrir vikið stöðuhækkun; hann varð nú yngsti aðstoðarframkvæmdastjóri fyrirtækisins.
Samt undi hann sér ekki hvíldar. Eftir aðeins tveggja ára starf hjá Bankers Trust sagði hann skyndilega upp og hóf störf hjá enn öðrum fjármálarisanum, D.E. & Shaw, en þeir réðu hann til að þróa sérhæft kerfi sem höndlað gæti flóknari einkasjóði.
Svo rann árið 1994 upp. Netið var þá nýtilkomið og sá Bezos fljótt að um óplægðan akur væri að ræða og taldi möguleikana óþrjótandi. Hann settist því niður og gerði lista yfir þá tuttugu vöruflokka sem hann taldi að gætu orðið vinsælastir á Netinu þegar fram liðu stundir. Að bókum undanskildum voru tónlist og tímarit, tölvur og hugbúnaður ofarlega á blaði. Hann valdi bækurnar, ekki vegna þess að þær voru ódýrar, heldur einfaldlega vegna þess að hann sá ekki í hendi sér að nokkur bókabúð væri nógu stór til að rúma alla þá mögulegu titla sem komið hefðu út. Að auki var enginn um hituna; Jeff Bezos yrði eini stóri bóksalinn á Netinu!
Amazon.com verður til
Þessi uppgötvun var sem vitrun frá Guði. Bezos sagði nær umsvifalaust upp starfi sínu, pakkaði búslóðinni saman og sagði flutningamönnunum að hann léti þá vita um áfangastaðinn þegar þangað kæmi. Að sögn eiginkonu hans höfðu þau enga hugmynd hvar þann stað var að finna. Að því loknu óku þau hjón út úr innkeyrslunni og hófu ferð sína þvert yfir Bandaríkin: konan undir stýri og Jeff farþegamegin með fartölvuna í kjöltunni; hann hringdi viðstöðulaust í vini og kunningja og kynnti hugmyndina fyrir þeim: bókabúð á Netinu! Þegar þau Bezos-hjónin stöðvuðu bílinn í Seattle hringdi hann í flutningamennina. Þau voru lent.
Líklega hafa fáir farþegar verið jafnafkastamiklir og Jeff Bezos: Í einu símtalanna tók hann hús á leigu í Seattle; í öðru tókst honum að safna milljónum dollara til að hefja rekstur; í tölvunni leyndist grunnkóðinn - upphafið að Amazon.com.
Í júlímánuði ári síðar opnuðust gáttir Amazon.com og kaupendurnir streymdu inn.
