Í síðasta tölublaði Tölvuheims var greint frá fyrsta töflureikninum, Visicalc.  Margir þakka þessari frábæru hugmynd því að forsvarsmenn fyrirtækja fóru að kaupa tölvur í auknum mæli.  Þetta var við lok áttunda áratugarins.  Það má með sanni kalla árin sem fylgdu í kjölfarið tímabil töflureiknanna.

Eins og áður hefur verið greint frá var VisiCalc fremur einfaldur töflureiknir og auðveldur í notkun. Honum óx hratt ásmegin. Þegar flóknir útreikningar urðu margfalt auðveldari en áður sáu framkvæmdastjórar ljósið þegar hugbúnaðurinn kom á markað. Ekkert viðlíka forrit seldist jafnhratt og VisiCalc og þeir Dan Bricklin og Bob Frankston, sem hönnuðu hugbúnaðinn, máttu því una vel við sitt. Þeir stofnuðu ýmis fyrirtæki í kringum sköpunarverk sitt og framleiðslufyrirtækið kallaðist t.d. Personal Software Inc. En miklar sviptingar lágu í loftinu.
Á þessum tíma voru einmenningstölvur að ryðja sér til rúms og margir fylgdust spenntir með. Þeir Bricklin og Frankston tóku hins vegar ekki eftir byltingunni. Þeir fylgdust ekki lengur með og þegar IBM kynnti fyrstu einmenningstölvuna sem gekk fyrir agnarsmáum örgjörva frá Intel í september 1983 skelltu þeir skollaeyrum við fréttunum. Það var engu líkara en að þeir hefðu lokað sig af inni í fílabeinsturni fræðanna. Ástæðan var einfaldlega sú að þeir höfðu ekki trú á því að hver sem væri gæti lært nokkurn skapaðan hlut á tölvur umfram kannski að kveikja á þeim. Þessi þvermóðska gerði nokkra samstarfsfélaga þeirra hjá framleiðslufyrirtækinu Personal Software Inc. ólma í að taka þátt í frekari tölvuvæðingu og fór að lokum svo að málið lenti fyrir dómstólum. Bricklin og Frankston eyddu öllum sínum tíma í málið. Á meðan þessu stóð sleit tölvunarfræðingurinn Mitch Kapor, sem var framleiðslustjóri Personal Software Inc sig lausan undan samningum. Hann hóf að þróa sinn eigin töflureikni undir fyrirtækjaheitinu Lotus Corporation. Afraksturinn var Lotus 1-2-3. Kapor taldi hugbúnaðinn viðunandi en ákvað samt sem áður að setja hann ekki strax á markað.

LOTUS 1-2-3
Eins og gefur að skilja studdist Kapor við VisiCalc er hann þróaði Lotus. Hins vegar gerði hann allt umhverfið notendavænna en áður. Þá varð allt einfaldara. Frágangur á flóknum talnarunum, gerð taflna og útskýringar þar að lútandi urðu mun einfaldari. Þá var hægt að búa til lítinn gagnagrunn og vista á diskum. Það sem munaði um voru litlu fyrirframgefnu formúlurnar sem gerðu það að verkum að notendur þurftu ekki að vera langskólagengir í tölvunarfræðum til þess að kunna að búa til einföld gröf. En svo virðist sem Kapor hafi haft samviskubit yfir því að nýta sér þekkinguna sem hann aflaði sér innan veggja VisiCalc og bauð þeim Bricklin og Frankston að kaupa það í heild sinni. Þeir neituðu á þeim forsendum að Lotus 1-2-3  byði upp á takmarkaða möguleika og gæti aldrei nýst sem skyldi sem viðurkenndur töflureiknir. Þetta kom flatt upp á Kapor. Hann lét hins vegar sitt ekki eftir liggja og hóf að selja sköpunarverk sitt í notendavænum umbúðum undir heitinu Lotus 1-2-3.

SÍÐUSTU DAGAR VISICALC
Þótt Mitch Kapor hafi stjórnað Lotus Corporation frá upphafi beindi hann athygli sinni að Lotus 1-2-3 til að byrja með. Hann stýrði þróun hugbúnaðarins frá 1982 til 1987 og bjó auk þess til fleiri hugbúnaðarvöndla undir nafni fyrirtækisins. En fáir þeirra slógu í gegn líkt og Lotus. Síðan hefur mikið vatn runnið til sjávar og Kapor hefur fyrir löngu snúið baki við Lotus og einbeitir sér þessa dagana að heilsu- og umhverfismálum.
Af VisiCalc er það hins vegar að frétta að árið 1985 keypti Lotus Corporation fyrirtæki þeirra Bricklins og Frankstons með manni og mús og fékk VisiCalc hugbúnaðinn með. Verðið var ekki hátt enda hafði veltan minnkað umtalsvert frá því sem best gerðist. Framleiðslu fyrsta almenna töflureiknisins sem þeir Bricklin og Frankston hönnuðu var hætt í kjölfarið.