Nýi farsíminn frá Sharp hefur innbyggðan, rafrænan bíllykil fyrir Nissan bifreiðar. Sharp og Nissan vinna saman að verkefninu í samstarfi við japanska símafyrirtækið NTT DoCoMo og getur farsíminn opnað um 950.000 bíla frá Nissan af ýmsum gerðum.

Síminn hefur samskonar lyklabúnað og rafrænir Nissan lyklar. Bílstjóri getur til að mynda opnað eða læst bifreið sinni með þar til gerðum tökkum á farsímanum í allt að eins metra fjarlægð. Frá þessu er sagt í frétt á vef IDGNS.

Rafsegulsskynjari í bílnum greinir nálægð símans. Einnig er hægt að nota símann til að ræsa eða slökkva á vélinni þegar inn í bílinn er komið. Það er gert með aðeins einum takka. Auk þess opna sérstakir skynjarar skottið þegar haldið er á símanum í ákveðinni fjarlægð.

Nissan-Sharp síminn er byggður á hönnun SH906i frá Sharp og lítur hann alveg eins út ef frátaldir eru tveir takkar í hægra horni efst á símanum sem gefa innbyggða bíllykilinn til kynna. NTT DoCoMo veitir notendum farsímaþjónustu og ábyrgist að aftengja bíllykilinn ef síminn týnist.

Í Japan eru farsímar notaðir fyrir miklu meira en símtöl. Fyrir utan bíllyklatæknina er hægt að nota farsíma sem kort í neðanjarðarlestir eða jafnvel sem greiðslukort í verslunum.

Nissan og Sharp sýndu bíllyklatæknina með frumgerð af nýja farsímanum á Ceatec raftækjasýningunni sem sem er haldin í Japan um þessar mundir og stefna að því að fjöldaframleiða nýja farsímann á næsta ári.

Smellið hér til að lesa meira um sýninguna.

Myndin er frá Ceatec Organizing Committee.