Samsung mun setja létta og litla fartölvu á markað í næsta mánuði, NC10, sem er svokölluð örfartölva eða „netbook“ up á ensku. Mikil samkeppni er á þessum markaði og ætlar Samsung ekki að vera eftirbátur samkeppnisaðila sinna í þessum efnum.

Örfartölvur hafa reynst vinsælar vegna þess að þær eru ódýrari en stærri fartölvur, það er auðvelt að taka þær með sér og tengja þær þráðlausu neti hvar sem er. Frá þessu er greint í frétt á vef IDGNS.

Samsung sagðist hafa rannsakað örfartölvumarkaðinn áður en NC10 var hönnuð og komist að því að notendur væru óánægðir með smæð lyklaborðs og lélega endingu rafhlöðu.

Úr því segist fyrirtækið hafa bætt með NC10, sem auk þess hefur töluvert stóran skjá. NC10 frá Samsung fer á markað í Kína, Hong Kong og Suður-Kóreu í október og í mörgum löndum Evrópu á sama tíma.

Myndin er frá Samsung Electronics.