Sprotaþing Íslands, eða Seed Forum Iceland, er haldið í áttunda sinn í dag í höfuðstöðvum Kaupþings í Borgartúni. Fimm íslensk sprotafyrirtæki hafa verið valin til þátttöku ásamt tveimur erlendum. 

Seed Forum Iceland er hugsað sem stefnumót frumkvöðla og fjárfesta og hafa sprotaþing af þessum toga verið haldin tvisvar á ári síðan árið 2005.

Mörg af framsæknustu nýsköpunarfyrirtækjum landsins hafa fundið fjárfesta og aðra samstarfsaðila á Seed Forum Iceland.

Íslensku fyrirtækin sem munu kynna sig á Seed forum í dag eru:

Clara sem notar gervigreind til að kanna viðhorf og tilfinningar sjálfvirkt á netinu, Marimo sem þróar tölvuleik og notar til þess reynslu sína af þrívíddarþróun, Orf líftækni sem framleiðir sérvirk prótein fyrir læknisrannsóknir, lyfjaþróun og snyrtivörur, TouristTV sem er net-ferðamiðill sem framleiðir og sýnir upplýsingamyndbönd á síðu sinni og Trackwell sem er leiðandi fyrirtæki í forðastýringarlausnum.

Erlendu fyrirtækin eru Glycomar sem sérhæfir sig í nýtingu sjávarafurða og Catchtheeye sem markaðsfyrirtæki sem sérhæfir sig í stafrænni samskiptatækni.

Seed Forum Iceland er stjórnað af Spotaþingi Íslands. Ráðstefnurnar eru haldnar í nánu samstarfi við Seed Forum International sem heldur utan um fjárfestingarþing í 19 löndum.