Call of Duty leikirnir hafa til þessa alltaf verið sviðsettir í kringum seinni heimstyrjöldina. Í Call of Duty 4: Modern Warfare tækla skaparar leiksins nútímann og er óhætt að segja að þeir geri það með stæl. Call of Duty 4: Modern Warfare gefur leikjum eins og Ghost Recon og Rainbow Six ekkert eftir, skilur þá eftir í rykinu ef eitthvað er. Call of Duty 4: Modern Warfare er nýji standardinn í her skotleikjum.
Það eru alltaf einhverjir gallar og Call of Duty 4: Modern Warfare hefur upp á að bjóða 2 galla. Þetta eru smávægilegir hlutir eins og það að ekki er hægt að spila leikinn í samvinnu við vini sína, eitthvað sem verður án efa lagað í uppfærslu. Hinn gallinn er hversu auðvelt það er að skjóta samherja sína, pirringur á stundum, svosem hægt að kalla þetta raunverulegt en pirrandi engu að síður.


Grafíkin í Call of Duty 4: Modern Warfare er hreint út sagt stórkostleg, hér á ferð er algerlega næstu kynslóðar leikur. Nákvæmnin er í fyrirrúmi og hefur tekist vel til með karaktera og vopn. Umhverfið er einnig mjög flott, það besta er þó hversu allt er vel smurt, allt rennur ljúft áfram þrátt fyrir fjöldan allan af hermönnum á vígvellinum og sprengingar og flugumferð á fullum dampi. Þetta gerir leikinn mjög áhrifaríkan fyrir spilarann og um leið hina bestu skemmtun.Hljóðið fylgir grafíkinni eins og skugginn, sprengingar og vopnaglamur hljóma raunverulega og öll vopnin hljóma kraftmikil. Það er gífurlega mikilvægt enda ekkert verra en vélbyssa sem að hljómar eins og loftbyssa.


Gervigreindin í Call of Duty 4: Modern Warfare er mjög vel útfærð, samherjar manns vinna sitt verk án fumls og fuðurs og stundum bjarga þeir lífi manns. Óvinirnir eru líka skarpir, fela sig, henda handsprengjum og gera fyrirsát. þetta setur leikhæfnina í hæsta gæðaflokk. Call of Duty 4: Modern Warfare er heldur stuttur í einmenningsspilun en það bætir mikið að hægt er að spila hann aftur í svokölluðu Arcade Mode. Þar fær spilarinn stig fyrir hvert dráp og ákveðið mörg líf til að lifa leikinn af. Net spilunin er svo fáránlega vel heppnuð, nóg af kortum til að spila og virkar netþjónustan í leiknum mjög vel. Ef að fólk fær sér skotleik fyrir þessi jól þá er Call of Duty 4: Modern Warfare algerlega þess virði að spandera krónunum sínum á.

Grafík 5.0
Frábær grafík setur nýjann standard í fyrstu persónu skotleikjum.

Hljóð 5.0
Allt virkar fullkomlega, tónlist, byssugelt, sprengingar og umhverfishljóð.

Tækni 4.5
Rennur mjög ljúflega þrátt fyrir hversu mikið er að gerast á vígvellinum. Mætti slaka aðeins á möguleikanum að skjóta samherja sína.

Leikhæfni og ending 4.5
Svolítið stuttur en Arcade Mode og Netspilunin reddar því.

Fyrir: PC, Xbox 360 og PlayStation 3