Tom Clancy´s Rainbow Six leikirnir eiga sér langa sögu og marga aðdáendur. Það sem að heillar fólk mest við Tom Clancy´s Rainbow Six leikina er nákvæmnin og hversu raunverulegir leikirnir hafa verið. Í Tom Clancy´s Rainbow Six: Vegas hafa áherslurnar breyst. Að auki er svo PSP leikjavélin eins langt frá Pésanum sem að Tom Clancy´s Rainbow Six leikirnir voru upphaflega hannaðir fyrir, og hægt er að komast.
Nú er áherslan meira á hasarinn en raunveruleikann sem að hentar PSP leikjavélinni ágætlega. Það verður þó að segjast að PSP útgáfan er langt á eftir öðrum útgáfum í gæðum og gjörfuleika. Því miður hefur ekki heppnast að flytja Tom Clancy´s Rainbow Six: Vegas yfir á PSP, að mörgu leyti skiljanlegt en engu að síður vonbrigði.

Grafíkin í Rainbow Six: Vegas er ágæt, en maður hefur þó séð það betra á PSP vélinni. Karakterar og vopn eru vel teiknuð og virðast vera trú upprunanum. Umhverfið er frekar einhæft, gangar, hótelherbergi og skrifstofur skipa aðalhlutverkið enda snýst leikurinn kannski um annað en útsýnisferð til Las Vegas.
Hljóðið er mjög vel gert, raunverulegt byssuglamur, háværar sprengingar og ágætis raddsetning. Tónlistin er bara áheyrileg enda kvikmyndaleg sem virðist vera það sem virkar best í mín eyru allavegana.

Rainbow Six: Vegas virkar ágætlega tæknilega, svolítið um bögga og hjökt í þrívíddarvélinni. Gervigreind bæði óvina og vina er ágætlega gerð það hjálpar til að það hefur verið fækkað í liðinu, nú eru bara 2 aðstoðarmenn og það má segja að það sé hámarkið fyrir reiknigetu PSP vélarinnar. Herkænskan hefur að miklu leyti vikið fyrir hasarnum í Tom Clancy´s Rainbow Six: Vegas sem að eru góðar fréttir fyrir PSP. Leikurinn er mun hraðari en fyrirrennararnir en um leið ekki eins innihaldsríkur.
Helsti galli Tom Clancy´s Rainbow Six: Vegas á PSP er stjórnkerfið, PSP vélin hefur einfaldlega ekki nógu marga takka til þess að stjórna leiknum svo vel sé. Þetta gerir leikinn erfiðan í spilun og er mjög pirrandi.
Það er erfitt að mæla með Rainbow Six: Vegas fyrir PSP eigendur, leikurinn er einfaldlega ekki nógu góður og stjórnkerfið gengur endanlega frá málinu dauðu.

Grafík 3.5
Fín grafík en alls ekki með því besta sem hefur sést á PSP Leikjavélinni.

Hljóð 4.0
Mjög vel gert, flottir effektar, raddsetning og tónlist.

Tækni 2.0
Stjórnkerfið er ferlegt, helsti galli leiksins og gerir leikinn ill spilanlegann.

Leikhæfni og ending 2.5
Lítið kjöt á beinunum, stuttur og einhæfur.

Fyrir: PSP

Snorri Gunnarsson