Ritstjórn PC World hefur gefið út sinn árlega lista yfir bestu vörurnar í tækniheiminum og þar er að vanda ýmislegt forvitnilegt. Sérstaklega vekja yfirburðir Apple athygli.

 

Þessi listi á sér langa sögu hjá PC World - allt aftur til byrjunar níunda áratugarins - og er því góð heimild um þróun tækninnar í gegnum tíðina. Síðustu árin hafa árlega verið valdar 100 tæknivörur, græjur, vélbúnaður, hugbúnaður og veftól, og þeim raðað upp í árslista. Svo má velta sér upp úr þessum árslista í leit að helstu „trendunum" í tækniheiminum.

 

Við skoðun listans að þessu sinni kemur í ljós að yfirburðir Apple eru orðnir næstum óhugnanlegir þegar kemur að þróun bestu tæknivaranna. Apple á hvorki meira né minna en tólf af 100 bestu vörunum - þeir framleiðendur sem eru í 2 - 3 sæti (Google og Microsoft) ná einungis fjórum vörum inn á listann.

 

Apple átti reyndar líka flestar vörur á listanum í fyrra - en þá voru þær „einungis" sex, þannig að yfirburðirnir fara hratt vaxandi. Og fjölbreytnin ræður ríkjum í þeim vörum sem Apple nær inn á listann - þarna eru símar, tölvur, skjáir og forrit, svo eitthvað sé nefnt. Þetta eru sem sagt: iPhone (2), iPod Touch (13), Mac OS 10.5 Leopard (17), Apple HD Cinema Display (18), Safari (22), MacBook Pro Penryn (26), Final Cut Studio 2 (28), iChat (33), Logic Studio (66), Apple TV Take 2 (80) og MacBook Air (89). Og takið eftir að sjö af þessum vörum ná inn á topp 30! Það mætti halda að listinn væri saminn af ritstjórum Macworld en ekki PC World...

 

Hins vegar ná tölvurisarnir tveir, Google og Microsoft einungis fjórum vörum inn hvor framleiðandi. Microsoft nær inn Windows XP (4), Xbox Live (12), Microsoft Tellme (63) og Office 2007 (83). Athygli vekur að Windows XP, tiltölulega gamalt stýrikerfi, komist inn á listann á meðan hið nýjasta, Windows Vista, er hvergi sjáanlegt. Það er væntanlega nokkur pólitík í því, þar sem Microsoft hefur verið harðlega gagnrýnt fyrir að ætla að hætta útgáfu Windows XP nú um mitt sumar þrátt fyrir að neytendur séu lítt hrifnir af því að skipta yfir í Windows Vista.

 

Google nær hins vegar hæst í 25. sæti með Google Maps, svo koma Google Docs & Spreadsheets (27), Gmail (41) og Youtube (81).

 

Athygli vekur að fyrsta sæti listans hreppir að þessu sinni kvikmyndaveitan Hulu, þar sem hægt er að kaupa mikinn fjölda nýrra kvikmynda og sjónvarpsþátta og horfa á beint af Netinu. Samkvæmt ritstjórn PC World er þetta besta tilraun framleiðenda til að nýta Netið til dreifingar á myndefni hingað til og þar með besta leiðin til að berjast gegn ólöglegri dreifingu á efni. Eins og við mátti búast er Hulu hins vegar einskorðuð við Bandaríkin og því lítið á henni að græða hér heima.

 

Jafnframt er það tímanna tákn að fjölmargar vörur sem tengjast samfélagsvefjum komast inn á topp 100 að þessu sinni, enda eru samfélagsvefirnir nýjasta netbyltingin. Þarna má til að mynda sjá Facebook (3), Flock (6), Wikipedia (10), Scrabulous (15), Twitter (19), Flickr (30) og Yelp.com (46), svo eitthvað sé nefnt.

 

En sjón er sögu ríkari - lista PC World yfir 100 bestu vörurnar 2008 má finna í heild sinni með því að smella hér.