GTA IV reyndist hafa selst í yfir 6 milljónum eintaka á heimsvísu á fyrstu vikunni sem þýðir að hann halaði inn yfir 500 milljónir Bandaríkjadala, – u.þ.b. 39 milljarða króna. Hvorki meira né minna. Bara á fyrsta deginum seldust 3,6 milljónir eintaka.

 

Þetta mun vera stærsta „frumsýningarvika“ sem um getur – ekki bara þegar kemur að tölvuleikjum, heldur hafa engar kvikmyndir eða hljómplötur náð inn viðlíka upphæð á fyrstu viku. Pirates of the Caribbean: Dead Man’s Chest og Spiderman 3 eru þær myndir sem hafa náð mestri innkomu á fyrstu viku – hvor skilaði framleiðendum ríflega 400 milljónum Bandaríkjadala eftir fyrstu sýningarviku.

 

Slíkar ofurupphæðir sýna enn og aftur það sem þeir sem hafa fylgst með tölvuleikjaheiminum og þróun tölvuleikja síðustu árin hafa löngum vitað – að þessi tegund afþreyingar er að verða ein sú umfangsmesta í afþreyingariðnaðinum. Sífellt fleiri hafa verið að átta sig á þessu, en það er ekki langt síðan margir héldu að tölvuleikir væru eitthvað sem einungis börn og unglingar stunduðu.

 

Vissulega eru ungu karlmennirnir enn stærsti hópur spilara, eins og sjá má af vinsældum leikja á borð við Grand Theft Auto, sem ganga út á bófahasar og bílaeltingaleiki. En málið er hins vegar að flóra tölvuleikjaspilara er orðin mun fjölbreyttari en svo og hefur aldursdreifingin aukist auk þess sem konur spila tölvuleiki í meiri mæli. Þessi þróun hefur ekki síst orðið vegna þess að úrval leikja hefur margfaldast, þannig að nú geta flestir fundið tölvuleiki við sitt hæfi á meðan áhugasvið ungra karlmanna var nær einrátt á árum áður.

 

Þessi aukna fjölbreytni og hinn mikli vöxtur sem hefur einkennt tölvuleikjaiðnaðinn síðustu ár eru enn eitt dæmið um það hvernig tölvutæknin hefur gerbreytt heimsmyndinni. Ég er ekki viss um að margir hefðu trúað því þegar þeir spiluðu fyrsta Grand Theft Auto leikinn árið 1997 (sjá mynd) að ellefu árum síðar myndi sama tölvuleikjasería slá sjálfum kvikmyndaiðnaðinum við með jafn hressilegum hætti og nú er orðin raunin.

 

Og þegar maður skoðar hinn gríðarlega mun á upprunalega leiknum og þessum nýjasta – bara svona út frá tæknilegu og fagurfræðilegu sjónarhorni – þá er eiginlega ómögulegt að reyna að ímynda sér hvernig tölvuleikir muni líta út eftir 10 ár. Möguleikarnir eru nær óendanlegir.