Lesendum Tölvuheims, bæði prentútgáfunnar á sínum tíma og svo vefútgáfunnar, dylst væntanlega ekki sú skoðun mín að áhersla á álver við uppbyggingu atvinnulífs á Íslandi sé ekki skynsamleg, heldur þurfi að setja eggin í fleiri körfur. Sem betur fer virðist ein glæný „karfa“ vera að bætast við atvinnulíf okkar.

 

Síðast nefndi ég þetta í pistli sem reyndar snerist að megninu til um Flickr, þegar ég óskaði þess að hugmyndir um uppbyggingu netþjónabúa myndu ekki gleymast eftir að umræða um ný álver var hafin af alvöru aftur eftir nokkuð hlé. Mér varð reyndar að ósk minni þá, því daginn eftir að pistillinn birtist kynnti fyrirtækið Verne Holding áætlanir um uppbyggingu gagnavers – sem reyndar er mun fallegra orð en netþjónabú og verður notað hér eftir af þeim sem þetta skrifar, að minnsta kosti.

 

Hugmyndir þeirra Verne Holding-manna hljóma eins og tónlist í mínum eyrum, a.m.k. samanborið við gamla, þreytta álversgaulið. Fyrirtækið skrifaði sem sagt í lok febrúar undir samninga við Landsvirkjun, Farice og Þróunarfélag Keflavíkurflugvallar um raforku, gagnaflutninga, hús og lóð fyrir nýtt alþjóðlegt gagnaver við Keflavíkurflugvöll.

 

Fram kom við undirskrift samninganna að gagnaverið muni rísa á þessu ári og taka til starfa í byrjun næsta árs. Áætlað er að heildarfjárfesting Verne í verkefninu verði um 20 milljarðar króna á fimm árum og að bein og óbein efnahagsleg áhrif innanlands nemi um 40 milljörðum króna. Jafnframt var sagt að um 100 störf verði til við rekstur gagnaversins á næstu fjórum árum. Allt hangir þetta svo saman við lagningu nýs sæstrengs sem mun bæta verulega netsamband Íslands við umheiminn.

 

En Verne Holding eru ekki þeir einu. Annað fyrirtæki sem er öllu smærra í sniðum þó, Data Islandia, hefur einnig tilkynnt byggingu gagnavers á Suðurnesjum. Það var gert fyrir tæpu ári þegar fyrirtækið skrifaði undir viljayfirlýsingu við Sandgerðisbæ um byggingu gagnavers sem í fyrsta áfanga yrði 800 fm, en fullbyggt um 4000 fm að stærð á fyrrum varnarsvæði Sandgerðisbæjar. Sögðu forráðamenn fyrirtækisins að eftir að fyrsti áfangi yrði tekinn í notkun myndu skapast 20 ný störf við rekstur gagnaversins og að jafnframt væri fyrirtækið að skoða byggingu fleiri gagnavera víðsvegar um landið.

 

Fyrir skömmu undirrituðu svo sveitarfélagið Ölfus og fyrirtækið Greenstone viljayfirlýsingu um undirbúning byggingar gagnavers í Þorlákshöfn. Í samkomulaginu felst að sveitarfélagið leggur fyrirtækinu til 50.000 fermetra lóð, þar sem fyrirhugað er að reisa um 40.000 fermetra byggingu yfir starfsemina. Gert er ráð fyrir að með gagnaverinu skapist allt að 50 störf og stefnt er að því að rekstur fyrsta áfanga hefjist árið 2010.