Margt hefur verið sagt um mikið notagildi Netsins í gegnum tíðina. Hafi einhverjir þó hallmælt því hefur það sennilega verið á þeim nótunum að mikil netnotkun valdi því að fólk hangi of mikið inni og hreyfi sig minna en áður. Sú þarf þó alls ekki að vera raunin – þvert á móti er hægt að nota Netið til að auka útiveruna og gera hana ánægjulegri.

Þessu hafði ég ekki áttað mig á fyrr en á síðustu vikum og mánuðum eftir að langþráð heilsubótarátak fór af stað á mínu heimili. Það byggist meðal annars á því að fara út að hlaupa reglulega og ganga á fjöll. Mér til mikillar ánægju komst ég fljótlega að því að hægt er að nota Netið á ýmsan máta til að aðstoða við þessa iðju.

Strax eftir að lagt var af stað í fyrsta skokk áttaði ég mig náttúrlega á því að ég hafði ekki hugmynd um hversu langt ég væri að hlaupa. Fyrsta hugsun var að hoppa upp í bíl og keyra meðfram leiðinni sem hlaupin hafði verið, en það er að sjálfsögðu löngu úrelt – nú höfum við Google Earth til að leysa þetta verkefni! Þar var hægt að zoom-a inn á Reykjavík, nánar tiltekið Vesturbæinn, og nota vegalengdarmælinn til að stika út hlaupaleiðina. Eftir það hefur Google Earth verið algerlega nauðsynlegt tól við hlaupaskipulagninguna. Og svo hefur Hlaup.is aðstoðað við að skipuleggja rétta hlaupaprógrammið.

Leiðarlýsingar og veðurspá
Hvað varðar fjallaferðirnar er Netið til ýmissa hluta nytsamlegt. Það er t.d. fyrsta stoppistöð þegar verið er að leita að gönguleiðum, því oft og tíðum má rekast á góðar leiðarlýsingar einhvers gönguhópsins, sem einfaldar mjög undirbúninginn. Í slíkum leiðarlýsingum er hins vegar oft ekki getið sérstaklega hvernig best sé að komast að upphafspunkti göngunnar – þ.e. hvaða afleggjara þurfi að taka og hvaða vegi skuli keyra. Þar kemur kortavefurinn map24 að góðum notum, en þar er að finna fjölmörg örnefni og yfirlit yfir helstu vegi, sem getur oft einfaldað leitina að réttu akstursleiðunum að fyrirhuguðu fjalli.

Og svo er auðvitað alger nauðsyn að átta sig á veðurspánni á mun nákvæmari hátt en hægt er með hefðbundnu veðurfréttunum. Þar er Netið náttúrlega alger snilld – því þar er hægt að finna mjög ítarleg yfirlit yfir veðurspá ákveðinna landshluta bæði til skamms og langs tíma. Þar er Belgingur til að mynda mjög öflugur, því með rennistikunni þar má sjá hvort væntanleg sé úrkoma eða öflugur vindur á gönguleiðinni á áætluðum göngutíma. Skýjahuluspáin á Veður.is getur svo verið hjálpleg þegar kemur að því að spá fyrir hvort útsýni verði gott af viðkomandi fjalli.

GPS engin nauðsyn
Hægt er að vera jafnvel enn heppnari í upplýsingaleitinni, eins og t.d. þegar ég gekk á Heklu fyrr í sumar. Þá fannst vefmyndavél sem sendir beint út frá fjallinu, þannig að hægt var að virða fyrir sér skýjafarið áður en lagt var af stað úr bænum – sem minnkar líkur á að maður fari fýluferð.

Ég á samt samt margt eftir ólært í þessu – til að mynda er ég ekkert kominn inn í GPS-væðinguna, sem er auðvitað bylting út af fyrir sig. En það kemur væntanlega einhvern daginn og þá opnast manni enn ein leiðin til að nýta tæknina og Netið til að aðstoða sig í útiverunni. Reynsla síðustu vikna hefur þó kennt mér að GPS sé engin nauðsyn – nettenging, örlítil útsjónarsemi og aðstoð frá Google getur komið manni ansi langt í útivistinni.

Kristinn Jón Arnarson er almannatengslaráðgjafi hjá AP almannatengslum og fyrrverandi ritstjóri Tölvuheims.