Þetta er auglýsingin um Landsbankadeildina sem birtist t.d. í stóra fljótandi auglýsingaplássinu hægra megin við mbl.is. Nú þekki ég ekki söguna á bak við auglýsinguna, en grunar að hún sé þróuð og kostuð af Landsbankanum, aðalstyrktaraðila Íslandsmóta karla og kvenna í knattspyrnu.

 

Það sem er svo sérstakt við þessa auglýsingu er að hún er í raun einn stór gagnagrunnur um íslenska fótboltasumarið sem búið er að koma afar haganlega fyrir á litlu svæði. Í raun er auglýsingaborðinn örvefur út af fyrir sig, þar sem nálgast má m.a. öll úrslit úr deildunum tveimur, yfirlit yfir allar umferðir, markaskorara, stöðu í deild, helstu tölfræði og nöfn allra leikmanna liðanna. Og ekki er nóg með það, heldur má þarna horfa á fimm bestu mörkin í hverri umferð – í sjálfum auglýsingaborðanum!

 

Þetta finnst mér sérstaklega gott framtak í ljósi þess að ég hef aldrei fundið vef sem setur þessar helstu grunnupplýsingar um gang mála í efstu deildunum fram á skýran, einfaldan og aðgengilegan hátt. Margir reyna að setja fram slíkar upplýsingar árlega, helstu fréttavefir og svo sérvefir um íþróttir eða fótbolta, en illa hefur gengið að mínu mati að setja þetta fram á einfaldan hátt. Þar til nú að það hefur tekist – í tiltölulega litlum vefborða.

 

Ef grunur minn reynist réttur, að þetta auglýsingaverkefni sé kostað af Landsbankanum, verð ég jafnframt að hneigja mig djúpt fyrir því hve smekklega kostunaraðilinn kemur sínum hlut á framfæri. Þróun borðans, uppfærsla upplýsinga og auglýsingabirtingar kosta væntanlega skildinginn og margar markaðsdeildir hefðu því freistast til að gera hlut fyrirtækisins miklu stærri eða jafnvel frekar sett upp sérvef, tryggilega merktan fyrirtækinu, í stað þess að bjóða allt efnið í formi auglýsingaborða á vefjum þriðja aðila á borð við mbl.is eða fotbolti.net.

 

Þess í stað sýnir kostunaraðilinn efninu fulla virðingu, heldur sig til hlés og leyfir því sem mestu máli skiptir að njóta sín – deildunum og áhugamönnum um fótbolta til heilla.

 

Það leynist líka í þessu máli mikilvægur lærdómur – ótengdur fótbolta í sjálfu sér – fyrir áhugamenn um tækni og markaðssetningu á Netinu. Hann er sá að vefauglýsingar geta verið svo miklu meira en enn ein útgáfan af sömu auglýsingaherferðinni. Ef vel er að verki staðið geta vefauglýsingar verið gagnvirkar, sjálfstæðar upplýsingaveitur sem nota má til að koma á samskiptum milli lesandans og auglýsandans, báðum til gagns.

 

Enn sem komið er hafa þessir möguleikar tiltölulega lítið verið nýttir, en Landsbankadeildarauglýsingin gæti e.t.v. markað tímamót hvað það varðar. Þetta er a.m.k. eina netauglýsingin sem er alveg pottþétt að ég muni smella reglulega á næstu mánuðina.